Dick Kooy is skriuwer en aktyf efter de skerms yn de tsjerke. Hy dielt graach wat fan syn ûnderfinings mei de leden fan de gemeente.
De koster is sneins de earste en lêste persoan yn’e tsjerke. De ljochten moat oan, it gleske wetter foar de dûmny moat klearset wurde en dat binne noch mar in pear saken dy’t op harren wurklist steane. As dan efkes letter de beamer- en de kameraman binnen komme en harren saken klear meitsje, is it opnij de koster dy’t hjir syn soarch sjocht. “Binne jimme al ta oan in bakje kofje?”, freget hy as sy alles foarinoar hawwe en tôget fuort nei de kofjekorner.
As hy dan fuort nei it yntochtlied de doarren sluten hat en de tsjinst begjint, is it opnij de tsjerkebewarder mei oeral eagen en earen dy’t in freonlike tsjinst bewiist. Hy leit wat snobbersguod foar it technysk team del. “Foar daalks ûnder de preek”, leit hy derby út. “Ja, hja moat goed op de meiwurkers passe no.” Wy meie bliid wêze mei ús team fan kosters. (foto d.d. 16-2-2025)
